ភ្នំពេញ៖ នាយករដ្ឋមន្រ្តីកម្ពុជា សម្ដេចតេជោ ហ៊ុន សែន បានផ្ញើសារលិខិតមួយច្បាប់ជូនប្រធានរដ្ឋសភាសម្ដេចពញាចក្រីហេង សំរិន ក្នុងឱកាសអបអរពិធីបុណ្យចូលឆ្នាំថ្មីប្រពៃណីជាតិខ្មែរដោយថារដ្ឋសភាក្រោមការដឹកនាំរបស់សម្ដេចពញាចក្រីបានសម្រេចនូវស្នាដៃធំធេងជាច្រើន និងជូនពរក្នុងឱកាសឆ្នាំថ្មីសូមសម្ដេចទទួលសម្រេចបានការងារថ្មីជាច្រើនថែមទៀត។

ក្នុងសារលិខិតជូនពរចុះថ្ងៃទី៦ ខែមេសា ឆ្នាំ២០២២ សម្ដេចតេជោ ហ៊ុន សែន បានលើកឡើងថា៖ «តាមនាមរាជរដ្ឋាភិបាលនៃព្រះរាជាណាចក្រកម្ពុជា មន្ត្រីរាជការទូទាំងប្រទេសនិងក្នុងនាមខ្លួនខ្ញុំផ្ទាល់ ព្រមទាំងភរិយា ខ្ញុំសូមសម្ដែងនូវសេចក្ដីសោមនស្សរីករាយឥតឧបមាចូលរួមជូននូវសព្ទសាធុការពរជ័យ បវរសួស្ដី សិរីមង្គល វិបុលសុខ មហាប្រសើគ្រប់យ៉ាងចំពោះ សម្ដេចអគ្គមហាពញាចក្រី ប្រធានរដ្ឋសភានៃព្រះរាជាណាចក្រកម្ពុជា និងសម្ដេចធម្វិសុទ្ធវង្សា សូមបានសមប្រកបទៅដោយបញ្ញាញាណភ្លឺថ្លាកាយពលរឹងមាំ សុខភាពល្អបរិបូណ៌ ជន្មាយុយឺនយូរតរៀងទៅ ដើម្បីដឹកនាំរដ្ឋសភាដែលជាស្ថាប័ននីតិប្បញ្ញាត្តិនៃព្រះរាជាណាចក្រកម្ពុជា សម្រេចបាននូវស្នាដៃធំធេងថ្មីៗជាច្រើនថែមទៀតសំដៅបន្តចូលរួមចំណែកអភិវឌ្ឍជាតិមាតុភូមិ និងពង្រឹងនីតិរដ្ឋនៅកម្ពុជាឱ្យកាន់តែរីកចម្រើនខ្លាំងក្លាថែមទៀតតរៀងទៅ»។

សម្ដេចតេជោ បានបូងសួងដល់គុណបុណ្យវត្ថុស័ក្កិសិទ្ធិទាំងឡាយក្នុងលោក ពិសេសទេវតាឆ្នាំថ្មី ជួយអភិបាលប្រោះព្រំនូវពរជ័យចំពោះសម្ដេចពញាចក្រី និងសម្ដេចធម្មវិសុទ្ធវង្សា និងក្រុមគ្រួសារ សមប្រកបដោយពុទ្ធពរដ៏ប្រសើថ្លៃថ្លាគឺអាយុ វណ្ណៈ សុខៈ ពលៈ កុំបីឃ្លៀងឃ្លាត៕